Mendizabala LHIIko Ibilgailu Hibrido eta Elektrikoen Masterreko ikasleek auto elektrikoaren diseinuan berrikuntzaren aldeko apustua egin dute, eta Euskelec programaren zazpigarren edizioan aurkeztuko dute. Ez daude prest aurreko edizioan San Mamesen lortutako lehen postua kentzen uzteko.
Euskelec lehiaketa honetan Euskal Autonomia Erkidegoko lanbide heziketako ikastetxe ezberdinetako ikasleek parte hartzen dute. Ibilgailu % 100 elektriko bat diseinatzen eta eraikitzen dute, mugimendu-oinarri komun baten gainean (motorra, motor-kontrolatzailea eta bateriak). Helburua da ikasleen talde-lana sustatzea eta sormen-jarduera oinarritzea ibilgailu elektrikoen ezagutza teknikoa lortzeko elementu pedagogiko gisa.
ETHAZI metodologiarekin lan egiten dute, elkarlaneko ikaskuntzan oinarritutako pedagogia iraultzailea, arazo praktikoak ebaztera bideratua. Parte-hartzaileek ibilgailu elektrikoak eraikitzeaz gain, lehiaketak planteatzen dituen erronketarako irtenbide berritzaileak eta ikuspegi sortzaileak ere aztertzen dituzte.
Jarraian, proiektua eta hori ahalbidetzen duen taldea hobeto ezagutzeko aukera duzue.
